Durangoko Ezkurdi frontoian jokatu zuten atzo arratsaldez Jai Alai Ligako txapelduna erabakitzeko bigarren finalerdia. Maila handiko bi bikote neurtu ziren atzokoan Bizkaiko herri honetan: Ispasterreko Aritz Erkiaga eta Bidarteko Thibault Basque, Xabier Barandika gernikarraren eta Imanol Lopez zumaiarraren aurka. Maila handiko partida eskaini zuten lau puntistek.
Denboraldi osoan maila itzela erakutsi du Erkiagak –jokatutako hamahiru txapelketetatik hamar irabazi ditu–, baina atzo ezin izan zuen hasieratik gauzak garbi zituen Barandikaren eta sekulako partida jokatu zuen Lopezen aurka. Apenas sartu izan zuen jokoan Erkiagak, bereziki, lehen jokoan. Barandika eta Lopezek, berriz, tartea zabaltzen joan ziren jokoan zehar, eta 11-15 emaitzarekin irabazi dute lehen seta. Tanto ikusgarri ugariz gozatu ahal izan dute Durangoko frontoiko harmailak bete dituzte pilotazaleek.
Bigarren jokoan aurretik jarri zien Erkiaga eta Basque (3-1), baita hiruna berdintzea lortu ere horiz jantzitako Barandikak eta Lopezek. Marroiek berriro aurrea hartu zuten (6-4, 9-5), eta jokoa irabazteko tanto bakarrera ere jarri ziren (14-10). Bazirudien bigarren jokoa beraientzako izango zela, baina Barandika eta Lopez ez zeuden ezer oparitzeko prest, hortzak estutu eta aldea jaten hasi ziren. Horri esker, eta Erkiagak partida amaieran egindako akats batzuez baliatuz, jokoa 14-15 emaitzarekin irabazi zuten eta partida bi eta huts emaitzarekin.
Finala datorren astelehenean, 19:00etatik aurrera, jokatuko dute Durangoko Ezkurdin. Barandikak eta Lopezek Gorka eta Johan Sorozabal anaiak izango dituzte aurkari txapelaren bila.