Eusko Label Winter Series txapelketak hartuko du herenegun amaitu zen Ligaren lekukoa zesta puntako egutegian. Datorren astelehenean hasi eta otsailaren 16ra bitartean jokatuko dute txapelketa hau Gernika Jai Alai pilotalekuan, eta bertan hamasei puntista arituko dira lehian, zortzi bikotetan eta bi multzotan banatuta. Horien artean izango da duela bi egun Liga irabaztea lortu zuen Imanol Lopez puntista zumaiarra. Ligan gertatu bezala, Xabier Barandika gernikarrarekin osatuko du bikotea Lopezek. Multzo berean arituko dira Urreisti-Gorka, Goitia-Del Rio eta Laduche-Manci bikoteak.
Hirugarren jardunaldira arte, azaroaren 11n jokatuko dutena, ez da Lopez jokoan sartuko. Partida hartan Urreisti eta Gorkaren aurka jokatuko dute Gernika-Lumokoak eta Zumaiakoak. Lehen fasea hamar jardunaldiz osatuko da eta, berrikuntza gisa, finalerdiak ligaxka moduan jokatuko dituzte lau bikote onenek. Final handia otsailaren 16an jokatuko dute, eguerdi partean.
Finala izan ezik, partidak astelehenetan jokatuko dituzte eta denak ere ETB1en bidez ikusi ahal izango dira, 22:20tik aurrera.