Gazteak beteranoen aurka arituko dira gaur arratsaldez Gernikako Jai Alai frontian, zesta puntako denboraldi berriari hasiera eman dion Winter Series txapelketako hirugarren jardunaldian. Gaur sartuko da jokoan, gainera, Imanol Lopez puntista zumaiarra. Xabier Barandika gernikarrarekin bikotea osatuta –liga irabazi duen bikotea–, Gorka Sorozabal lapurtarraren eta Eñaut Urreisti mutrikuarraren aurka arituko da.
Urreistik eta Sorozabalek aurrez debuta egin dute txapelketaren edizio honetan, hiru jokotan eta Goitia eta Del Riori irabaziz, eta gauzak estu jarri nahiko dizkiete gaurkoan bizkaitarrari eta gipuzkoarrari. Azken bi hauek, berriz, partida irabazteko grinarekin kantxaratuko dira, ahal dela, bi jokotan.
Partida 19:30ean jokatuko dute. Gernikako frontoira hurreratu ahal ezingo dutenek, ETB1en bidez ikusi ahal izango dute, aurrez grabatuta, 19:30etik aurrera.