Ostirala da Santa Zezilia Eguna, baina Zumaiako Musika eta Dantza Eskolako ikasle eta irakasleek egun bat lehenago, bihar, osteguna, eskainiko dute, urteroko legez, egun horri lotutako emanaldia. 18:30ean izango da, Zumaiena ikastetxeko aretoan.
Ubillos jauregiko eskolan eskaintzen diren ikasgai desberdinetako ikasleak igoko dira agertokira saio laburrak eskaintzera. Hala nola, musika tailerrekoak, kantu koralekoak, metal taldekoak, triki taldekoak, antzerki taldekoak, euskal dantzakoak, talde instrumental eta dantzakoak, eta banda txikikoak.
Bandak, hilaren 30ean
Santa Zeziliarekin lotuta, Zumaiako Musika Bandak ere kontzertu berezi bat eskainiko du. Azaroaren 30ean izango da, 13:00etatik aurrera, Zumaienako aretoan.