Santa Zezilia eguna da gaur, azaroak 22, baina atzo hasi zituzten musikarien eguneko ospakizunak Zumaian. Izan ere, Musika eta Dantza Eskolako haurrek emanaldia eskaini zuten Zumaienako aretoan, eta Ubillos jauregian eskaintzen diren irakasgai desberdinetako ikasleak igo ziren taula gainera saio laburrak eskaintzera.
Musika tailerrekoak, kantu koralekoak, metal taldekoak, trikitixa taldekoak, antzerki taldekoak, euskal dantzakoak, talde instrumental eta dantzakoak, eta banda txikikoak ikusi ahal izan ziren, besteak beste.
Bandak, hilaren 30ean
Santa Zeziliarekin lotuta, Zumaiako Musika Bandak ere kontzertu berezi bat eskainiko du. Azaroaren 30ean izango da, 13:00etatik aurrera, Zumaienako aretoan.