Jai Alai Winter Series txapelketa irabazteko faboritoen artean zeuden Barandika eta Imanol Lopez zumaiarra, baina finalerdietara pasatu ezinik geratu dira atzo Gernikan jokatutako partida galdu ondoren. Lehen jardunaldian Urreisti eta Gorka Sorozabalen aurka galdu eta gero, bai ala bai irabazi behar zieten Laduche eta Manciri txapelketan aurrera egiteko aukerak mantendu nahi bazituzten. Edo, behintzat, joko bat egin. Baina, ez zen hala izan, eta, ondorioz, duela hilabete pasa Durangon Jai Alai Liga irabazi zuen bikotea neguko txapelketatik kanpo geratu da.
Lehen jokoa irabazi 15-11 emaitzarekin irabazi zuten Ludovic Laduche lapurtarrak eta Mikel Mancisidor mutrikuarrak. Horrek are eta zailago jarri zizkien gauzak bizkaitarrari eta zumaiarrari. Bigarren jokoa irabaztetik hurbil izan ziren Barandika eta Lopez (10-13, 13-14). Jokoko azken bi tantoak, baina, Laduche eta Mancirentzako izan ziren, eta 15-14 emaitzarekin irabazi zuten seta, eta bi joko eta huts emaitzarekin partida. Hala, txapelketatik kanpo geratu ziren Barandika eta Lopez.