Zuopa Zumaiako Osasun Publikoaren Aldeko plataformak bere aldarrikapenak plazaratzen jarraituko du hil honetan ere. Izan ere, salatu dute berdin jarraitzen duela anbulatorioko egoerak: gaur gaurkoz, lau mediku eta bi pediatra daude lanean, eta Gabonetan oporrak direla eta, gutxiago izan daitezkeela ere uste dute.
Amara Berriko EAG itxi egingo dutela ere jakin berri du Zuopak, eta "onartezina" da itxiera, azaldu dutenez: "Lehen arreta lanean ez dagoenean Etengabeko Arreta Guneetan artatzen dira osasun arazo larriak ez dituzten pazienteak". Gaineratu dute Zarauzko EAGren egoera ere "kolokan" dagoela.
Zumaiako eta inguruko biztanleak osasun publikoaren alde mobilizatzera deitu dituzte. Etzi egingo dute elkarretaratzea, ostiralean, 12:00etan osasun zentroaren parean.