Faxismoaren aurkako borrokan hildako herritarren izenak daramatzan monolitoa jarri zuen Zumaiako Udalak duela urtebete Gernika parkean, lehen Gernikako arbola zegoen lekuan. 1936ko altxamenduaren ondoren faxistek fusilatu zituzten zumaiarren, eta frankismoaren aurkako borrokan hildakoen izenak bildu zituen udalak oroigarri honetan.
Monolito hartan jasotako izenei beste bost gehituko dizkiete orain. Faxismoaren aurkako borrokan hildako beste bost zumaiarren izenak egiaztatu ditu Aranzadi zientzia elkarteak, eta horiek gehituko dizkiote oroigarriari. Hala, udalak azaldu duenez, "faxismoaren aurkako borrokan hildako guztien memoria kolektiboa sendotzen jarraitu nahi du udalak, herriko eragileekin eta herritarrekin batera. Oroitzapen honek, gainera, faxismoaren aurkako borroka eta justizia historikoa aldarrikatzen ditu".
Horretarako, ekitaldia antolatu du Zumaiako Udalak datorren larunbaterako, "faximoaren aurkako borroka omentzeko". Eguerdiko 12:00etan egingo dute, eta aipatu bost herritar hauen familiartekoak izango dira bertan. Herritar oro ere gonbidatu ditu udalak ekitaldi honetara.