Ikuskizun gutxi izango dira Zumaian Errege Magoen desfileak adina jende mugitzen duenik. Bai kabalkada bertako partaide izanez, baita kaleetako espaloitik jarraitzen ere. Gaur ere hala izan da, eta milaka lagun atera dira kaleta Meltxor, Gaspar eta Baltasarren desfilea ikustera.
Azken urteotako ohiturari jarraituaz, Errege Magoak itsasotik heldu dira Zumaiara, belaontzi batera igota. Itsas kiroldegi parean lehorreratu dira, eta karrozetara igota, desfileari ekin diote. Etxezarreta kaletik Txomin Agirre kaira heldu dira, eta Saregile plaza parean buelta emanda, Erribera kalean sartu da desfilea. Gurrutxaga plazara heltzerakoan, karrozetatik jaitsi dira eta azken metroak oinez egin dituzte Jaiotza bizidunaren aurrera heldu arte. Han haurraren aurrean gurtza egin dute, berriro karrozetara igota etorritako lekutik joateko.
