2024. urtea garaipenarekin amaitu zuen Frida Watkins zumaiarrak, Emakumea Pilotari txapelketa irabazita, eta 2025ari modu berean eman nahiko dio hasiera puntista gazteak. Gaur, 20:00etan hasita, Berriatuko Masterseko finalak jokatuko dituzte Mendibarren frontoian, eta emakumeen finalean izango da Watkins. Jaialdirako sarrerak ordubeteko epean agortu ziren.
Elaia Gogenola berriatuarrarekin osatu du zumaiarrak bikotea txapelketa horretan, eta pasa den ostiraleko finalerdia 2 eta 1 emaitzarekin irabazi ondoren, lortu zuen bikoteak finalerako txartela. Txapelak erabakiko diren partidan Ihart Arakistain eta Arai Lejardi izango dituzte zain. Hauek Masterseko lehen finalerdia irabazi zuten 2 eta 0 emaitzarekin.
Jarraian, gizonen Masterreko finala jokatuko dute Erkiaga-Argoitia I.a eta Barandika-Zabala bikoteek.