Lau pilota partida jokatuko dituzte datorren asteburuan Zumaiako Aitzuri pilotalekuan. Ostiralean eta larunbatean izango dira norgehiagokak, eta egun bakoitzean bina partida izango dira.
Ostiralean, 19:00etan hasita, bi norgehiagoka izango dira Aitzurin. Lehenbizi, larruzko paleta modalitateko gazte kategoriako partida jokatuko dute Zumaiako eta Adurtzako pilotariek. Jarraian, Udaberri txapelketako partida jokatuko dute nagusien kategoriako bigarren mailako Zumaia eta Beotibar 2ko kirolariek. Gomazko paleta modalitatean jokatuko dute partida hau.
Larunbatean beste bi norgehiagoka izango dituzte Zumaiako frontoian. 16:00etan, Udaberri txapelketako partida izango dute infantil kategoriako Zumaiako eta Txost 1eko pilotariek paleta modalitatean. 18:00etan, berriz, ohorezko mailako zesta punta partida jokatuko dute Zumaiako eta Markinako kirolariek.