Zurrunka Teatroa konpainiaren Gure kanoa haurrentzako antzezlana ikusi ahal izango da otsailaren 2an, eguerdiko 12:00etatik aurrera, Aita Mari aretoan. Sarrerak aurrez eros daitezke bihartik aurrera Turismo Bulegoan edo, Internet bidez, sarrerakzumaia.eus webgunean, 4,25 euroan.
Sinopsia
Abba, Senegaleko arrantzale familia batean jaiotako haur ausart zein xarmagarriaren istorioa da. "Arrainen Etxean” arrantza egiten jarraitu ahal izateko, Abba abentura luzean murgilduko da, bi mundu ezberdinen kulturak hurbilduz eta Maam Kumbaren ahotsa Izaroren herriraino emanez.
Migrazioa, Ipar eta Hegoaldeko herrialdeen arteko harremana eta ama lurraren zaintza izango da gai nagusi ikusle guztientzako txontxongilo ikuskizun sakon, dibertigarri eta poetiko horretan.
Abentura eta pasioz beteriko istorio honek, herrien taupada eta kantuen bitartez, esperantzak bizitzarekin elkarbizitzen duen parajera eramango du ikuslea.