Gizonezkoen taldeak utzitako traineruarekin aritu izan dira orain arte arraunean Telmo Deun arraun elkarteko emakumezkoak. Traineru propioa eskuratzearekin batera, hari izena jartzeko prozesua abiatu zuen arraun elkarteak abenduan, eta bazkideen proposamenak jaso ondoren, hautatu dute izen berria: Saregileak.
Arraun elkarteko kideen ustez, Zumaiarekin, itsasoarekin eta emakumeekin lotura duen izena da: "Ehunka urte dituen lanbidea da, emakumeek arrantzarako tresneria eta aparagailuak egin eta zaintzen zituena". Kostaldeko emakume saregile guztiak omentzeaz gain, "itsasoarekin eta emakumeekin lotura errotua" duen izena da, "hemendik aurrera lotura estuagoa izango duena". Julio Beobide ibiltokian aritzen ziren Zumaian lanean, sarea zabaltzeko nahiko toki zutelako han, arraun elkarteko kideek azaldu dutenez.