Zumaiako Herri Lasterketa jokatuko dute bihar arratsaldean. Haur eta gaztetxoen lasterketak jokatuko dira lehenbizi, eta helduena ondoren, 17:00etatik aurrera. Bihar arratsalde partean jendetza izango dela aurreikusten da.
Horrek eragina izango du herriko trafikoan ere. Udaltzaingoak esanaren arabera, Axular ibiltokia itxi egingo dute ordubetez, 17:00etatik 18:00etara bitartean. Zubitxikitik Txikierdira bitarteko tartea autoen joan-etorrirako itxita izango da. Herrirako joan-etorriak N-634 errepideko saihesbidearen bidez egingo dira. Herritarrei eskatu diete aipatutako ordu horietan autoa ez hartzeko, "ezinbestekoa ez bada, behintzat".
Kirol probak eragina izango du, baita ere, Lurraldebuseko autobusen bi zerbitzutan. Zumarragatik Zumaiara 17:20an heltzen den busak, eta Zumaiatik Zumarragara 17:45ean aterako den ibilgailuak ez du geldialdirik egingo Etxezarreta kaleko geralekuetan.