Orratz begia. 1936 – Gipuzkoako gerra haurrak izeneko erakusketa dago ikusgai egunotan Alondegiko Oxford aretoan. Intxorta 1937 kultur elkarteak memoria historikoa gordetzeko egindako proiektuetako bat da honako erakusketa, eta Arrasaten (Gipuzkoa) aurkeztu eta gero Zumaian izan da ikusgai otsailaren hasieratik hona.
Bertan, Espainiako gerra zela eta, beraien etxeak utzi eta erbestera joan behar izan zuten haurren izenak, irudiak eta haien testigantzak jasotzen dituzte.
Erakusketa igandera arte bisitatu ahal izango da, arratsaldez, 18:00etatik 20:00etara bitartean. Larunbatean eta igandean eguerditan ere zabalik izango da, 12:30etik 14:00etara.
