Iaz ez den olagarro zoparik eman irailean egindako Olagarro Egunean, eta aurten ere antzera gertatu daiteke. Horren atzean, olagarro lehor eskasia dago. Udalak ohar bidez azaldu duenez, "urtez urte geroz eta zailagoa bihurtu da tokiko olagarroak harrapatu zein horiek lehortzen dituzten pertsonak aurkitzea". Horrek arriskuan jarri dezake olagarro egunean zopa ematea, eta, denboran hurbilago, San Telmo jaietako olagarro zopa lehiaketa.
Hori dela eta, eskasia horri erantzun edo irtenbide bat eman nahian, Zumaiako Udalak gai honekiko interesa eta zeresana duten herritarrak bildu nahi ditu, "elkarrekin irtenbide bat topatzeko". Herritar horiek harremanetan jar daitezke udalarekin, turismoa@zumaia.eus helbidera mezu bat bidalita, edo, telefono bidez, 943-14 33 96 zenbakira deituta.