Emakumearen Nazioarteko Eguna da gaur, martxoak 8. Ospakizunaz haratago, feminismoaren aldarria kalera ateratzeko eguna da gaurkoa, eta horren harira manifestazioa deitu du Zumaiako Mugimendu Feministak gaur eguerdirako. Faxismoaren kontra ausardia eta aliantza feministak lelopean egingo dute martxa herriko kaleetan zehar. Manifestazioa 13:00etan abiatuko da Saregile plazatik.
Aurretik, goizeko 11:00etan hasita, zuzeneko irratsaioa egingo dute Kofradian.
Ekitaldiak hilean zehar
Martxoaren 8a gaur bada ere, egun horren inguruko ekitaldiak hilabete osora luzatuko dira. Hala, pasa den asteazkenean zabaldu zuten Emakumeon Etxean Haurralde fundazioaren Malen Etxearen Ausencias en rojo erakusketa. Mostra hori martxoaren 18ra arte bisitatu ahal izango da.
Datorren asteartean, hilaren 11n, 17:30ean, Zaintza prozesuko beste bilera bat egingo dute Basadi auzategian. Bi egun geroago, ostegunean, hilaren 11n, Molestias clownicas antzezlana izango da Emakumeon Etxean, Virginia Imazen eskutik. Emanaldia 18:30ean hasiko da.
Hurrengo asteartean, martxoaren 18an, haurdunaldi subrogatuei buruzko analisi feministak izango dituzte hizpide Emakumeon Etxean, June Fernandez kazetariaren eskutik. 18:30ean hasiko da saioa.
Martxoaren 26an, berriz, asteazkenez, formazio saioak eskainiko dituzte Zumaiako eskoletan. Hilaren 27an, aldiz, RR_6_erre (AH) emanaldia eskainiko du Maialen Lujanbiok, 18:30ean, Emakumeon Etxean.
