Emanaldi berezia eskainiko du ZUMB Zumaiako Udal Musika Bandak bihar, igandearekin. Robert W. Smith konpositore estatubatuar ezaguna omenduko dute kontzertuan, eta hark konposatutako zenbait pieza joko dituzte. On Kixote Mantxakoaren istorio soinuduna da, hain zuzen ere, errepertoriorako hautaturikoa: The Quest, Dulcinea, Sancho and the Windmills eta Illuminations abestiak interpretatuko dituzte. Zaldun ibiltaria eta bere ezkutari leial eta baldarraren bidaia irudikatzen du soinuaren bidez, eta kontatzen du nola hartuko dituzten lantza ezpata babesgabeak defendatzeko.
2023ko irailean hil zen Robert W. Smith estatubatuarra, eta bandetarako musika-literaturako konpositore ezagun eta emankorrenetako bat izan da. Guztira, 700 konposiziotik gorako katalogoa du, gehienak Warner Bros Publications eta Belwin katalogoarekin elkarlanean sorturikoak.