Olarrusub klubeko kide Eider Gutierrezek Euskadiko apnea txapelketa irabazi du pasa berri den asteburuan. Gasteizen jokatu dute txapelketa, eta Zumaiako klubeko kirolaria parte hartu duen hiru modalitatetan lehena izan da. Hala, proba estatikoan, lau minutu eta 26 segundoan egon zen aurpegia urazpian zuela arnasik hartu gabe; aleta bakarreko proba dinamikoan, 101 metroko distantzia egin zuen; eta aletarik gabekoan, berriz, 105,6 metro. Azken bi hauetan ere, arnasik hartu gabe egin zuen aipatu distantziak.
Txapelketa horretan izandako garaipenari esker, Espainiako txapelketan arituko da orain Gutierrez. Gasteizen jokatuko dute txapelketa hori ere, apirilaren amaieran, eta Euskadiko selekzioarekin lehiatuko da Olarrusubeko kirolari arrasatearra.