Zabaldu dute tren geltoki azpiko pasabidea

Juan Luis Romatet 2025ko mar. 31a, 16:25

Tren geltokiko pasabide berria. (Sara Utrera)

Bidaiariak pasabidetik nasetara eramango dituzten bi igogailuak ere martxan jarri dituzte. Azken urteetan, Zumaiako tren instalazioetan 15 milioi euro inbertitu dituztela nabarmendu du Susana Garcia Chueca sailburuak geltokira egindako bisitan. 

Euskotrenen Zumaiako tren geltoki berritua dagoeneko martxan da. Gaur goizean zabaldu dute Estazio auzotik geltokira eramaten duen pasabide berria. Bost metro zabaleko bideak –aurretik zegoenaren bikoitza– eramango ditu bidaiariak geltoki azpira, eta handik eskaileren edo igogailuen bidez igoko dira nasetara. Igogailu bakoitzak zortzi pertsona eraman ahal izango ditu. 

Geltokiaren pasabideko irekieran egon da Susana Garcia Chueca Mugikortasun Jasangarriaren sailburua. Adierazi duenez, Zumaiako geltokian egindako lanen bidez, "irisgarritasuna eta segurtasun-sentsazioa hobetu ditugu, eta horrela Eusko Jaurlaritzatik trenbide-sarean lortu nahi ditugun bi helburu garrantzitsuei erantzun diegu".

Hedabideetara igorritako oharrean jasotzen denez, Jaurlaritzak 15 milioi euro inbertitu dituzte Zumaiako trenbide sarearen hobekuntzan. Hor sartzen da, baita ere, Urola gaineko Trenzubiaren konponketa. Garcia Chuecaren ustetan, hobekuntza horiek guztiak "funtsezkoak dira pertsonek autoa utzi eta gure egunerokoan trenera igo gaitezen errazteko, lanera edo ikastera joateko; beraz, funtsezkoak dira pertsonek oinarrizko eskubideak baliatu eta aukerak izan ditzaten". 

Tren kotxetegi berria

Euskotrenen tren kotxetegi berria ere Zumaian kokatuko da, eta geltokiaren lanen amaiera, kotxetegiko obren hasierarekin bat egingo duela ere nabarmendu du sailburuak. Instalazio berriek 2.000 metro karratu inguru hartuko dituzte, eta bost unitate hartzeko eta mantentze-lanak egiteko edukiera izango du. Donostiako Amara geltokiaren lekukoa hartuko du kotxetegiak. Izan ere, behin Donostiako metroaren lanak amaitzean, Amarako geltokia desagertu egingo da, eta han egoten ziren trenak ordutik aurrera Zumaiako kotxetegira eramango dituzte. 

Zumaia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide