Zumaiako Udalak eta Gertu merkatarien eta ostalarien elkarteak udaberriko ErrotaHerria kanpaina jarri dute martxan. Aurrekotan bezala, Zumaiako komertzio eta tabernetan erabili ahal izango diren erosketa txartelak jarriko dituzte herritarren eskura. Kanpainaren sustatzaileek azaldu dutenez, mila erosketa txartel jaulkiko dituzte oraingo honetan.
Txartel horien bidez, 30 euro ordainduta, 40 euroko gastua egin ahal izango da herriko saltokietan. Txartel bakoitzak 10 euroko lau zati edukiko ditu, banaka edo batera erabiltzeko. Bonoak apirilaren 10ean jarriko dituzte salgai Turismo Bulegoan.
Bada berrikuntza bat, eta da pertsona bakoitzak behin bakarrik erosi ahal izango dituela txartelak. Gainera, gehienez, bi txartel eskuratu ahal izango ditu, eta ezinbestekoa izango da, norberarenaz gain, beste pertsonaren txartel identifikagarri baten kopia edo argazkia erakustea.
Bestalde, kanpainan parte hartu nahiko duten saltokiei ere aukera zabaldu diete apuntatzeko. Gertu elkarteko bazkideak diren taberna eta saltokiek ez dute aurrez izena eman beharrik izango. Gertukoak ez diren komertzioek, aldiz, datorren ostiralera arte izango dute apuntatzeko epea, zumaiagertuelkartea.eus webgunean.