Espainiako apnea txapelketa jokatu dute pasa berri den asteburuan Gasteizen (Araba). Zumaiako Olarrusub klubeko kide Eider Gutierrezek hartu du parte bertan, Euskadiko selekzioko kide gisa. Emaitza bikainak lortu ditu Gutierrezek eta domina bat eskuratzeaz gain, Euskadiko marka berriak ere ezarri ditu.
Lau modalitatetan lehiatu da Gutierrez Espainiako txapelketan. Modalitate estatikoan, sei minutu eta 47 segundoan egon da burua urazpian sartuta, arnasik hartu gabe. Denbora horri esker, zilarrezko domina eskuratu du Olarrusubeko kideak, baita Euskadiko marka berria ezarri ere.
Beste bi modalitatetan ere marka berria ezarri du Gutierrezek: aletarik gabeko modalitatean, 110,8 metro egin ditu, eta monoaletarekin 142,8 metro. Aletarekin egindako proban, bestalde, 113 metro egin ditu. Egindako lan horrek guztiak balio izan du Euskadik taldekako txapelketa irabazteko.