Gazteek komunitatean parte hartze aktiboa izan dezaten, diruz lagunduko ditu aurten ere udalak gazte ekimenak. Izan ere, martxan da bigarren urtez dirulaguntza deialdia, eta jakinarazi du 5.000 euro banatuko dituela halako proiektutan. Maiatzaren 30era bitarte aurkeztu ahal izango dira proposamenak.
Gehienez ere, 2.000 euroko laguntza jaso ahal izango dute eskatzaileek. Zumaiako 18 eta 30 urte bitarteko herritarrei zuzenduriko deialdia da, eta aisialdiarekin, ekintzailetzarekin, zientziarekin, ikus-entzunezkoekin, teknologia berriekin nahiz argitalpenekin lotutako proiektuak aurkeztu ahal izango dira deialdira.
Interesdunek maiatzaren 30era arteko epea izango dute eskaria egiteko, ondorengo dokumentazioarekin batera: jarduera memoria, aurrekontua, dirulaguntza eskaerei buruzko adierazpena, zinpeko aitorpena, proiektuan genero ikuspegia landu den zehaztapena eta euskararen tratamendua jardueraren hedapenean. Zumaiako Udalaren webgunean aurki daiteke eskaera orria eta xehetasun gehiago.