Saskibaloiaz gozatzeko aukera izan zen atzo egun osoan zehar Zumaian. U17 kategoriako (17 urtez azpikoak) Gipuzkoako 3x3 saskibaloi txapelketa jokatu zuten kostaldeko herrian. Eusebio Gurrutxaga plazan muntatu zituzten saskibaloiko jokalekuak, eta han aritu ziren txapelketarako izena eman zuten hamazazpi taldeak: bederatzi gizonetan eta zortzi emakumetan.
Gizonen txanda izan zen goizez. Behin lehen fasea jokatuta, eguerdi partean jokatu zituzten sailkapeneko postuak erabakitzeko partidak. Finalean, Easo Basket klub donostiarra 16-7 emaitzarekin irabazi zion Iraurgi Saskibaloia talde azpeitiarrari. Hirugarren eta laugarren postuak erabakitzeko partidan, Mondragon Unibertsitateak 19-10 irabazi zion Goierriri.
Arratsaldean, 16:00etan, ekin zioten emakumeen txapelketari. Finalean, Easo Ibaeta Basketa eta Ordizia neurtu ziren. Partida estuan, donostiarrak nagusitu zitzaien goierritarrei, 13-11 emaitzarekin. Hirugarren eta laugarren postuak erabakitzeko lehian, Iraurgi Saskibaloiak 17-10 emaitzarekin irabazi zion Easo Basket Oriamendi taldeari.