Esprint modalitateko Getariako IX. Triatloia jokatuko dute larunbat arratsaldean, 16:00etan hasita. Kirol jarduera horrek eragina izango du, ez Getarian bakarrik, baita inguruko herrietan ere, txirrindularitza proba eskualdeko bide eta herri batzuetatik igaroko delako.
Hala, N-634 errepidea itxi egingo dute Getaria eta Zumaia artean, 16:00etatik 17:45era bitartean, bi noranzkoetan. 17:45etik aurrera, errepidea irekita egongo da, baina arretaz gidatzea eskatu dute.
Meaga eta Zumaia arteko GI-2633 errepidea ere itxi egingo dute larunbat arratsaldean, 16:15etik 17:30era bitartean.
Zarautz eta Zumaia artean AP-8 autobidea erabiltzea gomendatu dute, Getarian trafiko pilaketak ekiditeko.
Triatloia jokatzeak eragina izango du Lurraldebusen autobos zerbitzuetan ere, probak iraungo duen denboran ez delako autobus zerbitzurik izango.