Bilbon urtero egiten duten Zinegoak jaialdian erakutsitako sei film labur emango dituzte gaur arratsaldean Aita Mari zinema aretoan. Saioa 19:30ean izango da.
Zinegoak, Bilboko gaylesbotrans Nazioarteko Zinema eta Arte Eszenikoen Jaialdia da. Negu partean Bilbon egindako ekimena, Euskal Herriko herri askotara eramaten dute jarraian, ZGHedapena programaren bitartez. Hala, aurtengo jaialdian erakutsitako lanen lagina ikusteko aukera izango da Zumaian.
Erakutsiko dituzten lanak Mila Aquiliaren Mdb (Argentina, 2025), Angel Morales Ballestaren Arrecife (Espainia, 2024), Enock Carvalhoren Queimando por dentro (Brasil, 2024), Julen Gorosabalen Inkognita (Euskal Herria, 2024), Ander Iriarteren Judoka (Euskal Herria, 2024) eta Ane Ines Landeta eta Lorea Lyonsen Azkena (Euskal Herria, 2024) izango dira.