Europako Geoparkeen Astearen barruan, zenbait ekitaldi antolatu ditu Geoparkeak egunotarako. Aste honetan zehar izan dira ekitaldi horietako batzuk, eta datorren astean jarraituko du programak.
Horien artean da astearteko Geotalks saioa. Aita Mari aretoan izango da, 19:00etan, eta Miguel Delibes de Castro biologoa izango da aurtengo gonbidatua, eta Gracias a la vida lelopean, naturaren eta gizakiaren arteko harreman estuaz hitz egingo du Geoparkeko Zuzendari zientifiko Asier Hilariorekin. Kandido Urangaren irakurketa batekin borobilduko dute saioa, ukitu literario eta artistikoa erantsiz hizketaldiari.