Modu ezin ikusgarriagoan eman zion amaiera Jon Maiak duela lau urte abiatutako Kantu bat gara zikloari. Egun osoko egitarauari amaiera emanaz, emanaldi jendetsua prestatu zuen Itzurun hondartzan. Horren harira, Zumaia harri eta herri kontzertuan parte hartu zuten sortzaile guztiei eskerrak eman dizkie Zumaiako Udalak.
Hala dio udalak eskerrak emateko igorritako oharrean:
"Eskerrik asko, Jon, inplikazioagatik eta Zumaiarekin duzun harremana hain modu ederrean erakusteagatik. Esker bereziak baita herriko elkarte eta talde guztiei, ikuskizunean egindako ekarpenagatik. Baita Distirako lagunei, une gogoangarri hori iruditan jasotzeagatik eta ekitaldi kolektiboaren oroimena gordetzen laguntzeagatik.
Eskerrik asko baita udaleko langile guztiei (kultur arlokoak, udal brigadako langileak, udaltzainak...) antolaketa lanetan fin aritzeagatik, eta egunean bertan hainbeste inplikatzeagatik.
Eta esker beroak baita herriko elkarte eta talde guztiei, haien ekarpen handiagatik. Beste behin ere fin agertu da herriko elkartegintza.
Azkenik, herritarrei ere eskerrak: guztion artean Itzurun hondartza bete eta ingurunea hain ondo zaintzeagatik. Ekitaldi honen antolaketan praktikan jarritako auzolanak balio diezagula aurrerantzean ere. Eskerrik asko guztioi!"