Herriko adinekoei zuzendutako ekintza sorta prestatu dute aurten ere Nagusien astearen aterpean. Horren barruan, ekainaren 13an, igel eta toka txapelketak jokatuko dituzte Torreberriko aterpean. Egun batzuk geroago, hilaren 16tik 19ra bitartean, karta joko txapelketak izango dituzte Hogarreko tabernan.
Txapelketa horietan parte hartu nahiko dutenek aurrez izena eman beharko dute haien antolatzaile Beheko Plaza elkarteak Hogarrean duen bulegoan, goizeko 11:00etatik 12:00etara bitartean. Izen emate epea astelehenean zabalduko dute.
Hilaren 20an, arratsaldez, egingo dute txapelketa hauetako sari banaketa, Hogarrean. Jarraian, merienda eskainiko zaie bertaratuko direnei.
Omenaldia hilaren 15ean
Nagusien astearen barruan, aurten 90 urte bete edo beteko dituzten herritarrak omenduko dituzte. Ekitaldia ekainaren 15ean, igandean, egingo dute, 11:00etan, Alondegiko Hogarrean.