Urteko une berezienetakoa izango da ilunabarrarekin batera herrian. Ohiturari jarraituaz, sua piztuko dute herriko alde zaharrean San Juan egun bezperan, eta eguraldia lagun bada, ehunka zumaiar elkartuko dira bertan, haur zein heldu, suak sortzen duen lilurak erakarrita. 22:00etan piztuko dute sua Sanjuaniturran. Udal txistulari bandako kideek jarriko dute musika, eta Musika eta Dantza Eskolako euskal dantzetako ikasleak arituko dira suaren bueltan dantzan. Sugarren gainean salto egiteko aukera ere izango dute gazteek.
Ekhi gauak hartuko du lekukoa 23:00etan. Azken urteotan antolatu izan den ekintza Gernika parkean egingo dute, eta bertan parte hartuko dute joaldunek, adar jotzaileek, txalaparta jotzaileek eta Astindu dantza elkarteko kideek. Han ere sua piztuko dute, eta haren bueltan bilduko dira herritarrak.