Nazioarte mailako piraguismo probetan murgilduta dago Iñigo Peña piraguista zumaiarra. Duela hilabete, Hungarian jokatutako Munduko kopako proban lehiatu zen Peña, eta B finalean aritzearekin konformatu behar izan zuen. Emaitza hobeak lortu ditu zumaiarrak pasa berri den asteburuan Txekiar Errepublikako Racice hirian jokatutako esprint modalitateko Europako txapelketan.
1.000 metroko K1 modalitatean aritu da zumaiarra txapelketa horretan. Pasa den ostegunean izan zuen lehen proba Peñak, finalerdietarako sailkatze estropada, hain zuzen. Hirugarren txandan aritu zen, eta bigarren egin zuen, era horretan finalerdietara sailkatuz. Emaitza bera lortu zuen zumaiarrak egun bat geroago, larunbatean, jokatutako lehen finalerdian.
Atzo goizez jokatu zuten finala. Laugarren postuan igaro zuen Peñak 250 metroko partziala; 500 metrokoa bosgarren pasatu zuen, eta postu horretan zeharkatu zuen helmuga puntua, 3:28.670 denbora eginez. Txapelketa hasieratik buruan joan zen Fernando Pimenta portugaldarrak irabazi du.