Egun handia izango dute larunbatean Zumaiako puntistek. Arratsaldean, 17:00etan hasita, Gipuzkoako Herriarteko zesta punta txapelketa jokatuko dute Mutrikuk eta Zumaiak haien etxean, Mutrikuko Miruaitz frontoian.
Txapelketa osoan Zumaiarekin aritu diren sei puntistek jokatuko dituzte finaletako partidak: Watkins eta Silveti kadete mailan, Enbil eta Goñi jubeniletan eta Agirre eta Uranga seniorretan.
Txapelketako ligaxka fasean bitan neurtu ziren Mutriku eta Zumaia. Mutrikuarrek Aitzurin 1-2 emaitzarekin irabazi zuten, eta emaitza berarekin nagusitu ziren zumaiarrak Miruaitzen jokatutako bueltako jardunaldian. Beraz, aurreikuspenak betetzen badira, berdintasuna izan daiteke finaletan.
San Pedro txapelketa
Igande arratsaldean, bestalde, 16:00etan hasita, San Pedro txapelketako finalak jokatuko dituzte Aitzuri frontoian. Alebin, infantil eta kadete mailetan jokatu dute txapelketa hori, eta sei klubetako puntistak aritu dira lanean. Finala Noain nafarrek eta Mutriku gipuzkoarrek jokatuko dute.