EAEko Auzitegiaren epai batek zalantzan jarri du eskola kirolaren eredua. Horren aurrean hainbat iritzi entzun dira formula hori mantentzearen beharraz, haurrei onurak ekartzen dizkiela argudiatuta.
Zumaiako eragileak ere iritzi berekoak dira. Hala, Zumaiako Udalak, herriko ikastetxeek eta Zumaiako kirol klubek dei bateratua egin dute gurasoak deituz haien seme-alabak eskola kirolean izena ematera, eredu hura babestea "guztion ardura" dela azpimarratuta.
Deia egin duten eragileek ohar batean nabarmendu dutenez, eskola kirola ez da soilik jarduera fisikoa: "bizitzako ikasgaiak eskaintzen dituen espazio kolektiboa da, balioetan hezteko gune paregabea". Zumaian, urteetan "elkarlanean sendotu" den eredua dela ere esan dute, non eskolek, kirol klubek eta Udalak bat egin duten. "Gaur egun, komunitate osoaren babesa behar du bizirik iraun dezan", adierazi dute.