Guztia prest du Taosa Igeri Taldeak larunbat honetan jokatuko den Itzurun-Arranpla itsas zeharkaldirako. Goiz partean egingo dute haurren kategoriako proba, eta beranduxeago, eguerdian, helduena.
Lehenbizi, 11:00etan, haurren probari emango diote hasiera, eta Santiago hondartzatik edo paolbidetik irten beharko dute Arbustaingo Arranplara, adinaren arabera. 500 eta 1.000 metro arteko saioak egingo dituzte. Jarraian, 12:00etan, helduei emango zaie irteera. Igerilari hauek 3.000 metroko distantzia bete beharko dute, Itzurunen hasi eta Arranplan bukatzeko.
Izena kronoak.com webgunean eman daiteke, bihar gauerdira bitarte. Helduek 35 euro ordaindu beharko dituzte; haurrek, 15 euro.
Iaz, bertan behera
Iaz ezin izan zuten hondartza eta arrapala arteko zeharkaldia jokatu, itsasoaren egoeragatik. Itsasoz zeharkaldia ezin zenez egin, alternatiba bat aurkitu nahi izan zuten antolatzaileek, igeriketa saioa errioan egitea, hain zuzen ere.
Hura ere bertan behera utzi behar izan zuten azken orduan, uraren kalitateagatik, analisietan e-coli bakteria aurkitu zutelako.