Pasa den asteburuan eman zioten hasiera aurtengo Nazioarteko X. Flysch Organo Jaialdiarekin, Debako elizan emandako kontzertuarekin. Hamargarren aldia betetzen du aurtengoarekin organoak ezagutzera emateko antolatu zuten zikloak, eta Debako elizarekin batera, Zumaiako San Pedro parrokiak, Getariako Salbatore elizak eta Orioko San Nikolas elizak hartuko dituzte zikloko emanaldiak.
Bihar Zumaiaren txanda izango da, eta justu bi herritarrek emango dute kontzertua, Mª Carmen Azpeitia organo jotzaileak eta Marixi Sesma klarinetistak. Emanaldia 20:00etan hasiko da, aipatu bezala, San Pedro parrokian.
Hamabost erregistroko instrumentua
Stoltz anaiek 1890. urtean egindako organoa da Zumaiako San Pedro elizan dagoena. Estilo erromantiko frantsesean eraikitakoa, hamabost erregistro ditu eskuzko bi teklatutan eta pedaleko teklatu batean banatuta. Instrumentu hori XVI. mendeko aurreko organoaren kaxaren barruan dago. Tamaina gorabehera, bere edertasun eta konposizio bereziak moldakortasun harrigarria eskaintzen die organo-jotzaileei.
