Pizidoen familiako hegaztia dugu okil handia, pajaro carpintero izenez ezagunagoa dena. Gure lurraldean ikusten diren eta kolore zuri-beltzak dituen hiru espezieetatik handiena da. Ez da oso ugaria, baina ia baso zabal guztietan aurkituko dugu, batez ere, zuhaitz zaharrak aurkitzen diren eremuetan. Sabelalde zuria edo krema kolorekoa du, bizkarra beltza orban zuri handiekin, eta izter aldea gorri bizia. Beltza du burua, masail zuriekin apaindua. Moko oso sendoa du, beltza eta zorrotza, zuhaitz azal zein enborrak zulatzeko ongi prestatua.
Ar eta emeen arteko desberdintasun handiena kokotean bereiz daitekeen orban gorria da (argazkian ikusten duguna arra da); emeek, orban beltza dute lepoan. Basoetan ikustea ez da erraza, baina entzutea bai. Bere mokoarekin zuhaitz enborra indarrez jotzen du erritmo azkar eta biziekin, eta oso urrunetik entzun ditzakegu. Udaberrian bikoteek elkarri deitzeko erritmo bereziak erabiltzen dituzte.
Beste izen batzuk: basaokil, arotz handi, katatxori…
Luzera eta hego zabalera: 23-26 zm eta 38-44 zm.