Aurtengoarekin 49. aldia beteko du Itxas Gain piraguismo klubak antolatutako Urola ibaiaren igoera-jaitsierak. Datorren igandean jokatuko dute estropada, goizeko 11:00etan hasita. Aurten itsasbeherarekin batera jokatuko dute proba, eta horrek zirkuituan aldaketak egin behar izatea eragin du.
Ohi bezala, piraguistak lehorretik aterako dira, Santiago hondartzatik, hain zuzen. Behin piraguetara igota, eskoilerari buelta eman eta errioan gora egingo dute, ur araztegi parean buelta eman, eta ibaian behera egiteko. Piraguistak Talaipe pareraino helduko dira, han buiari buelta eman, eta berriro ibaian gora egin eta Itsas kiroldegi parean kokatuko duten helmugara heltzeko.
Paolbideko buelta bitan egingo dutela-eta, kirol portua itxita egongo da ordubetez, 11:00etatik 12:00etara bitartean.