Goizean goiz hasi da festa giroa Zumaian, eta Eusebio Gurrutxaga plazan herri bazkarian indarrak hartu ondoren, arratsalde partean ere ekitaldi ugari izan da festa giroaz gozatzeko.
Sagardo dastatzea izaten da Euskal Jai eguneko ekitaldi nagusienetako bat, jendetza biltzen baita haren bueltan. Aurtengoan, hamar etxetako sagardoak dastatzeko aukera izan da Beheko plazan: Aburuza, Bereziartua, Ekain, Gartziategi, Iparragirre, Izeta, Lizeaga, Petritegi, Satxota eta Urdaira, hain zuzen. Erkibe elkarteko kideen eskutik, txistorraz, hirugiharrez edota txokolatez beteriko taloak ere izan dira salgai.
Egunari amaiera emateko, dantzaldia izango da Amaia plazan, Joselu anaien eskutik.