Denboraldi berrira mira jarri duen beste kirol elkarte edo talde bat Zumaiako arraunlari beteranoena da. Uztailaren amaieran bukatu zuten aurtengo denboraldia arraunlari beteranoek, eta hilabete inguruko atsedenaren ondoren, berriro entrenamenduei ekingo diete. Hori dela eta, arraunlari ohiei edo arraunean ikasi nahi dutenei dei egin diete beteranoen traineruan aritzeko.
Gaur bertan hasiko dituzte entrenamendu saioak. Astean hiru saio egingo dituzte: asteartean eta ostegunean arratsaldez, 18:30ean, eta larunbatean goizez, 08:00etan. Parte hartu nahi dutenak Itsas kiroldegira bertaratu daitezke aipatutako orduan.