Lau urte igaro dira Emakumeon Etxea zabaldu zenetik, eta urteurrena ospatzeko elkartu ziren atzo dozenaka herritar han. Alarma morea taldearen kontzertuaz gozatu ahal izan zuten, eta mokadutxoren bat edo beste ere eskaini zieten bertaratutakoei, garagardoz nahiz ardoz lagunduta.
Emakumeon Etxeko kideek aipatu zuten datorren astetik aurrera hasiko direla ikasturteko jarduerak: abendura artean, hamabi jabetze eskola, zortzi elkargune eta hitzaldiak, liburu aurkezpenak, solasaldiak nahiz bakarrizketak ere izango dira. Bestalde, nabarmendu zuten urteotan guztiotan proiektua sendotu eta zabaldu egin dela, eta bide horretan jarraituko dutela lanean aurrerantzean ere.