Antolatu edo ez zalantzak izan baditu ere, Zumaiako Itzurun Surf Elkarteak (Ziske) herri mailako surf eta bodyboard txapelketa egingo du datorren asteburuan, Itzurun hondartzan. Itsasoaren egoera egokia bada, larunbatean eta igandean egingo dituzte txandak, proba edo kategoria desberdinetan banatuta: open, master, 18 urtez azpikoak, neskak eta longboard kategoriatan jokatuko dute txapelketa. Goizeko 08:00etan egingo dute checkinga, eta ordu erdi geroago ekingo diete txandei.
Interesdunek oraindik ere izena emateko aukera dute, Spot surf dendan. Parte hartzaile bakoitzak, gehienez, bi kategoriatan parte hartu ahal izango du, eta kategoriako 10 euro ordainduko ditu izena ematerako orduan.
Ikastaro inklusiboa
Iaz egin bezala, eta uztailean egiten duten Surfestako bidea jarraituta, behar berezia duten haur eta gazteei zuzendutako surf ikastaro inklusiboa egingo dute aurten ere. Larunbatean egingo dute, goizeko 11:30ean, eta ekintza hori antolatzeko La Caixa Fundazioaren laguntza izango du Ziske elkarteak.
Jarduerak ordu eta erdi inguruko iraupena izango du, eta haren helburua "inklusioa sustatzea" dela adierazi dute, "haur eta gazteei surfaz gozatzeko aukera emanez". Ikastaro horrekin amaituko dituzte uztailetik irailera bitartean egin dituzten eskolaz kanpoko jarduerak.