Asteburu honetan ere bi film emango dituzte Zumaiako zinema aretoan, biak ere beldurrezkoak, nahiz eta bigarrenak abenturazko film onenen kutsua ere baduen. Batetik, Expediente Warren sagako azken kapitulua emango dute, Expediente Warren: el último rito. Bestetik, zinemagintzako klasiko bat: Steven Spielberg ezagun egin zuen Tiburón.
2013an estreinatu zuten Expediente Warren: The conjuring filma. Izandako arrakasta dela eta, sagako beste hiru film egin dituzte, eta horietatik azkena da asteburu honetan Aita Marin eskainiko duten Expediente Warren: El último rito. Filma gaur, igandean eta astelehenean emango dute, 19:30ean. Emanaldietarako sarrerak aurrez eros daitezke, hemen.
Denborak klasiko bihurtuko zuen Tiburón estreinatu zutela 50 urte bete dira aurten, eta urteurren borobilarekin batera zinema aretora bueltatu da, aurpegia garbituta. Bihar, larunbatez, 19:30ean emango dute, eta igandean 17:00etan. Sarrerak aurrez erosteko aukera izango da, hemen.