Udazkenetik udazkenera bitartean, hilero liburu baten inguruan jarduten dute Irakurri matte Zumaiako irakurle taldeko kideek. Urriko saioan, Miren Agur Meabe idazle lekeitiarraren azken liburua izango dute hizpide, Amorante frantsesa izenekoa. Idazlea bera izango dute Uxue Alberdik gidatutako saioan, eta beraien iritziak partekatu edo galderak egiteko aukera izango dute taldekideek.
Poema bidez idatzitako nobela da Miren Agur Meaberen lan hori, pertsonaia arrunt baten epopeia xumea, thriller ukituekin.