Esti Curiel aktore zumaiarrak Eros eta Afroditaren aitortzak antzerki musikala eskainiko du bihar, ostirala, Zumaiako Aita Mari aretoan, Andoni Mutiloarekin batera. Sexu aniztasuna da antzezlanaren gai nagusia, baina sekretuez, gizarteko arauez, fideltasunaz, bikote monogamoen bilakaeraz, desiraz, frustrazioaz edota konpromisoaz ere jarduten du. Baita hain ezagunak ez diren kontzeptuez ere; PrEPaz, chemsexaz edo sexu transmisiozko infekzioen gorakadaz ere, esaterako. Hori guztia, musikalen osagaiak diren abestiez jantzita.
Oraindik ere eskura daitezke sarrerak. Internet bidez, sarrerakzumaia.eus atarian daude salgai, eta bihar emanaldia hasi aurretik ere bai, Aita Mariko leihatilan bertan. Emanaldia 20:00etan hasiko da.