Frontball pilota modalitatea ezagutzeko aukera izango da bihar goizez, Zumaiako Aitzuri frontoian. Goizeko 09:00etan hasita, Euskadiko frontball txapelketa jokatuko dute Zumaiako pilotaleku luzean. 23 urtez azpikoan eta maila absolutoan jokatuko dute, gizonetan zein emakumetan, eta partidak 14:00ak aldera arte jokatuko dituztela aurreikusi du antolatzailea den Euskadiko Euskal Pilota Federakuntzak.
Amerikar pilota eta euskal pilotaren arteko hibridotzat jotzen dute frontballa. 2008. urtean sortu zuten, eta 2015ean aintzat hartu zuen Euskal Pilotaren Nazioarteko Federakuntzak. Horma bakarrarekin jokatzen da modalitatea, ez du ezker hormarik.