Zubiaundiaren bueltan Iberdrola egiten ari den lanak tarteko, Santiagora joateko oinezkoen bidea itxita izango da hiru astez. Oinezkoentzako eta bizikletentzako 2,5 metroko zabalerako bide alternatiboa ezarri dute belar gunearen gainean.
Udalak azaldu du lanok Torreagako garapen urbanistikoari daudela lotuta, eta helburua dela Urola ibaiaren gainean dagoen tentsio handiko linea elektrikoa eta hari eusten dioten hiru dorreak kentzea. Torreagan eraikiko den transformazio zentro berria elikatzeko lur azpiko linea berria jartzen ari dira, hain zuzen.