ErrotaHerria egitasmoaren udazkeneko kanpaina abiatu dute Zumaiako Udalak eta Gertu merkatarien eta ostalarien elkarteak. Guztira, 1.000 eurosketa txartel jaulki dituzte aipatu kanpainan. Txartelak 30 euroan daude salgai, baina, gero, 40 euroko erosketa egin ahal izango da herriko merkataritza eta ostalaritza establezimenduetan.
Gaurtik aurrera dago erosketa txartel horiek eskuratzeko aukera, Turismo Bulegoan. Azken urteotan bezala, ilara luzea sortu da bulegoaren kanpoaldean lehen orduetatik. Herritar bakoitzak erosketa bakarra egin ahal izango du, eta gehienera jota bi bono eskuratu ahal izango ditu. Erosketa bakarrean egin beharko da hori, eta ezinbestekoa izango da, norberarenaz gain, beste pertsonaren txartel identifikagarri baten kopia edo argazkia erakustea.
Txartelak urtarrilaren 6ra arte erabili ahal izango dira. Kanpainaren sustatzaileek aurreikusi dutenez, 40.000 euroko inpaktu zuzena izango du herriko komertzioetan.