Lurraldeko beste herrietan egin bezala, Zumaian ere janari bilketa egin zuten pasa den asteburuan, Gipuzkoako Elikagaien Bankurako. Ostiralean eta larunbatean egon ziren boluntarioak Eroskiren eta BMren supermerkatuen ataritan, herritarrek emandako janariak eta bestelako produktuak jasotzen.
Bilketa kudeatzen aritu ziren Nagusilaneko lagunek eskerrak eman nahi dizkiete beraien aportazioa egin zuten herritar guztiei. Aldi berean, "eskuzabaltasun hau bideratzeko parte hartu duten bolondres guztiak bihotzez" eskertu nahi dituztela ere gaineratu dute. "Bilketa kopuruak argi uzten du oraindik gure herrian elkarri laguntzeko dagoen borondatea eta kontuan hartzekoa da elkartasun hori", adierazi dute.