Gabonen bueltan erakusleihoak atondu ohi dituzte Zumaiako merkatariek, eta aurrerantzean ere horretan jarraitzea bultzatzeko, erakusleiho lehiaketa antolatu du beste urte batez Gertu merkatari eta ostalarien elkarteak.
Lehiaketan parte parte hartu nahi duten establezimenduek aurrez izena eman beharko dute Gerturen 638 00 45 76 sakelako telefonora deituta edo WhatsApp bidez mezua bidalita. Posta elektronikoaren bidez ere izena emateko aukera izango da zumaiaelkartea@gmail.com helbidera idatzita. Izena emateko azken eguna abenduaren 9a da.
Parte hartzaileek abenduaren 10erako eduki beharko dute prest erakusleihoa, eta abenduaren 28ra arte mantendu, gutxienez. Epaimahaia erakusleiho dekorazioan eta ikus-diseinuan adituak diren hiru kidek osatuko dute, eta bost sari banatuko dituzte. Irabazleak 200 euroko balioa duen erosketa txartela jasoko du, eta 100na euro jasoko dituzte ondorengo kategoriatan onenak direnek: originalenak, koloretsuenak, ondoen argiztatutakoak eta Gabonak egokien islatzen dituenak.