Joan den larunbatean gerraren ondorioak jasan zituzten herritarrak oroitzeko ekitaldia izan zen Ataunen (Gipuzkoa), eta zumaiar bat izan zen omendutakoen artean: Pedro Basurto, 19 urterekin fusilatutako gazte zumaiarra. Ataungo Udalak herriko zenbait eragilerekin antolatutako memoria zikloaren barruan egin zuten omenaldia, eta han izan zen Marina Bidasoro ere, Zumaiako Udalaren izenean.
Zumaiarra zen jaiotzez Pedro Basurto, eta Gernika parkeko monolitoan ere ageri da bere izena. Zumaiako Udalaren hitzetan, halako ekitaldien helburua da iragana gogora ekartzea, gertatutakoa ahanzturan gera ez dadin eta belaunaldi berriei transmisioa bermatzeko. Norabide horretan, Zumaiako Udalak esan du azken urteotan sakondu nahi izan dutela memoria historikoaren lanketan, herri gisa gure historia modu duinean aitortzeko asmoz.
Frankismo garaiko bizipenak, oroitzapenak eta giza eskubideen urraketen inguruko informazioa partekatzera gonbidatu dituzte herritarrak. Telefonoz edo posta elektronikoz jasoko dituzte: 699 809 130 telefono zenbakira deituta, edo memoria@aranzadi.eus helbidera idatzita.